艾历拜利效力曼联多年伤多过踢，冇乜存在价值，呢位29岁中坚今夏被清洗，免费转投土超比锡达斯，结果佢近日喺一场热身赛再度受伤离场，曼联呢铺除笨有精。

艾历拜利2016年以3,000万镑加盟，效力曼联7年，当中上季外借畀马赛，佢为曼联上阵113场，但就有18次受伤纪录，几乎全身所有部位都试过受伤，大小腿足踝膝盖筋腱肌肉全部伤过晒，仲有头背肩颈都试过有事。曼联今夏同佢解约，畀佢自由身转会比锡达斯，就算收唔到转会费都可悭人工，呢个决定相当英明。

土耳其《国民报》报道，艾历拜利近日喺一场热身赛上阵，上阵期间就因腿部肌肉痛楚离场，现时比锡达斯正考虑安排核磁共振扫描检查，了解球员身体出咗咩问题。