曼城喺英超开季气势如虹，联赛5连胜延续「3冠王」霸气，其中新加盟嘅比利时翼锋谢利美杜古，上场联赛对韦斯咸光芒四射，连领队哥迪奥拿都承认「估佢唔到」，有传呢位21岁翼锋，甚至有机会踢走基亚利殊，成为曼城左翼正选。

谢利美杜古以速度同单对单过人见称，喺哥迪奥拿口中，佢系曼城少数嘅「正宗翼锋」。呢位比利时新星已连续2场正选，首仗对富咸踢右翼，上仗作客韦斯咸就代替受伤嘅基亚利殊踢左翼，入波之余全场威胁力强，呢场波佢有8次成功过人，比基亚利殊上季任何一场都多。虽然谢利美杜古同基亚利殊踢法完全唔同，但消息指哥迪奥拿希望有一位突破力强翼锋，作为破密集防守嘅关键棋子，所以唔排除基亚利殊会改踢中路位置。

哥迪奥拿表示，谢利美杜古嘅爆发连佢都觉得惊奇：「当球队买一个年轻球员，签约4年、5年，我哋就要有耐性去畀佢进步同成长，不过谢利美杜古喺加盟第2场就踢出呢个水平，完全超出我嘅预期，我印象中真系未遇过咁嘅情况。」哥迪奥拿对佢赞不绝口，谢利美杜古上位应该唔使等好耐。