英格兰前锋格连活特上年1月卷入家暴丑闻，今个夏天被曼联外借去基达菲，周日(17日)终於喺西甲亮相，相隔603日後再次喺正式比赛上阵，基达菲最终主场3比2绝杀奥沙辛拿。据报格连活特上阵後，被客队球迷辱骂「去死」，西班牙足总将展开调查。

格连活特自2022年1月为曼联对韦斯咸後，卷入家暴官非至今一直未有比赛，今仗对奥沙辛拿佢喺77分钟後备上阵，当时比数仲系2比2，基达菲最终喺完场前4分钟由马斯莫域攻入致胜球赢3比2。据《The Athletic》报道，格连活特上阵後，奥沙辛拿球迷高呼「格连活特去死」，球证报告亦有提及呢次事件，西班牙足总将作出调查。

奥沙辛拿教练阿拉沙迪赛後想淡化事件：「格连活特嘅事，司法制度已经有决定，佢系一个好好嘅球员。如果讲到球迷嘅叫嚣，基达菲球迷对我咃嘅攻击同样差劲，所有向对手嘅攻击都要一视同仁，而唔系搵某几句口号嚟大造文章。」