日本国脚久保建英喺西甲发展多年，上季喺皇家苏斯达开始担大旗，今季更加有星级表现，5场联赛已有3入波同1助攻。据西班牙《马卡报》报道，皇家马德里一直考察呢位日本小将嘅成长，而且拥有佢下次转会50%嘅收益分享权，意味皇马可以用半价3,000万欧元(约2.5亿港元)将佢带返马德里。

皇马喺2019年签入久保建英，但先後将佢外借去马略卡、维拉利尔同基达菲，上年以3,300万欧元(约2.75亿港元)卖畀皇家苏斯达，但合约列明佢下次转会，皇马可以分享50%收入。《马卡报》消息指，皇马对久保建英一直进行考察，如果佢继续进步，皇马唔排除会运用条款签佢返嚟，就好似今夏喺华历简奴签青训出身嘅法兰加西亚回巢一样。

报道指久保建英同皇苏嘅合约内，有6,000万欧元(约5亿港元)买断条款，而皇马因为可以分享一半收入，代表佢哋只要畀3,000万欧元，就可以签番久保建英，相当抵玩！