曼联领队坦哈格上任後，一直希望将球队改造成控球+逼抢型球队，不过日前喺英超主场对「同类踢法」嘅白礼顿，就被技术性击倒输1比3。据《The Athletic》报道，曼联变阵曾杀白礼顿措手不及，不过白礼顿领队迪萨比睇咗15分钟，简单一招就轻松破解坦哈格战术，为白礼顿取得漂亮胜仗。

曼联呢场波用钻石型中场而放弃翼锋，拉舒福特同海伦双箭头，一开始就压逼白礼顿双中坚，令白礼顿组织唔到而被围攻，坦哈格赛後亦大赞球队「头15分钟踢得好好」。不过迪萨比亦系战术大师，15分钟後就睇到破解之法，佢吩咐中坚云赫基同李维士邓克尽量拉开距离，控球嗰阵近乎变成两闸，曼联双箭头变成各自为战，逼抢系统即时崩溃，坦哈格亦束手就擒睇住球队输波。

迪萨比赛後曾表示：「喺头15至20分钟我哋捱打，因为曼联嘅阵式同我哋准备嘅唔同，不过我哋之後搵方法控制球赛就唔同晒，因为我哋有4个好快同好出色嘅前锋。」