阿仙奴喺英超作客1比0赢爱华顿，夏天加盟嘅门将大衞拉耶突然担正，佢亦以「零瑕疵」嘅表现作为回应。领队阿迪达赛後表示，未来会畀大衞拉耶同兰斯达尔轮流上阵，甚至乎会喺比赛中换龙门，同其他位置一样咁看待！

兰斯达尔近年系阿仙奴1号门将，表现亦获得好评，但阿仙奴夏天仍然引入西班牙国脚大衞拉耶。兰斯达尔头4轮把关3胜1和，今场突然改用大衞拉耶，阿迪达解释：「我一直强调每个位置要有2个好球员竞争，当你有两个咁有质素嘅球员，点解唔用？」大衞拉耶今场所受压力唔大，全场只需要作出1次扑救就完成「零封」，但佢帮助後场组织表现突出，全场34次传球有98%成功率，成功破解爱华顿前场逼抢。

门将位置普遍系「不变应万变」，不过阿迪达赛後就有崭新谂法，表明会将门将同其他位置一样咁轮换：「我算系年轻领队，教波只系3年半时间，但已经有唔少遗憾，其中有2次比赛期间，我觉得换龙门会更好，但我冇勇气去做，事後觉得唔开心。其实点解唔可以换呢？当另一个门将都有咁高质素，因应情况换龙门完全冇问题。加比尔捷西斯赢嘅冠军多过我同队中任何人，但佢今场做後备，冇人提出质疑，嚟紧有各项赛事，我要求球员齐心为球队战斗。」