周一(18日)凌晨英超赛事，阿仙奴作客1比0险胜爱华顿，6年来首次喺葛迪逊公园球场赢波，5战得13分力逼榜首曼城(15分)。面对爱华顿铁桶防守，阿仙奴入波嚟自精彩短角球组织，而且用「揼波钟」战术令爱华顿防守松懈，入波嘅角球就足足用咗26秒，呢个奇招顺利为阿仙奴全取3分。

阿仙奴对上一次作客爱华顿赢波，已经系2017年由云格执教嘅年代，今场「兵工厂」完全主导战局，控球率高达76%，角球数亦有11次，但要撕破爱华慎死守都唔易。去到69分钟，阿仙奴右路短角球组织，经过6脚第一时间传球後，由李安度杜沙特乖巧射入，呢球亦系全场唯一入球。

李安度杜沙特入波後，阿迪达即刻同教练团逐一击掌庆祝战术成功，评述嘅加利尼维利表示：「我好有兴趣阿仙奴今场嘅角球战术，佢哋每次都企喺度等好耐，到球证都差唔多要出黄牌、主场球迷最鼓噪一刻先至开出，而且有2至3次角球都系咁样做，用26秒嚟开短角球系好夸张，但战术成功咗。」

消息指阿仙奴明知爱华顿後防制空力强，所以改用短角球组织破密集，而「揼波钟」战术可以令防守球员喺等待期间冷却，开波後跟唔上阿仙奴嘅节奏而失位。前阿仙奴球星禾确特亦表示：「每次角球都好耐，我觉得爱华顿球员被人捉到路，因为分心而走甩看管目标，相信之後会有唔少球队效法阿迪达呢个战术。」

入球功臣李安度杜沙特赛後透露：「爱华顿好多高佬，所以我哋用短角球去搵机会，阿迪达同教练团队准备咗各种战术，球员都好开心。」据Opta数据显示，自上季英超开始，阿仙奴已经16次靠角球攻势入波，系同期英超角球入波最多嘅球队。