车路士继续沉沦，作客联赛场场有失波嘅般尼茅夫，竟然搵唔到入波，双方颗粒无收，0比0完场，车仔主帅普捷天奴真系要谂谂计！

普捷天奴今仗终於弃用3中坚，改用4人防线，贵价防中摩西斯卡些度因刚为厄瓜多尔踢完南美区世盃外，舟车劳顿下连後备都冇。

「水货」翼锋梅迪历担正，与史达宁支援箭头尼高拉斯积逊，呢位乌克兰国脚初段非常活跃，佢先喺左路横传，但干拿加历查撞射高出，之後佢再策动攻势，但尼高拉斯积逊劲射中柱弹出，干拿加历查近射又过唔到般茅门将尼图，半场互无纪录。

下半场车仔继续抢攻，梅迪历於左路禁区外被侵犯博到罚球，史达宁妙射中楣弹出，高维尔立即执死鸡破网，可惜越位在先食咗铺诈胡。

之後车仔用从曼城来投嘅新星高尔彭马入替梅迪历，加强攻力，但反而般尼茅夫嘅攻势更到肉，可惜入唔到波，喺比赛尾段，车仔有尼高拉斯积逊、高尔彭马射门都系搞唔掂，最终双方互交白卷完场。