曼联今个夏天重建，清走唔少冇用球员，不过将青训新星艾兰加卖去诺定咸森林，就引嚟部份球迷质疑。21岁嘅艾兰加喺诺定咸森林表现出色，其中「扭波距离」更加系英超No.1，曼联依家闹「翼锋荒」情况下，唔知有冇後悔错放艾兰加。

艾兰加今季英超仲未踢过正选，4场联赛都系後备入替，但佢喺有限时间下表现出色，对阿仙奴带足半场後交靓助攻，上轮对车路士更一箭定江山，森林领队谷巴表示：「艾兰加嚟自曼联，好後生已经有一定名气，我哋需要呢啲对比赛饥渴嘅年轻球员，佢融入需要一个过程，我肯定佢会系森林非常重要嘅球员。」

英超数据显示，喺头4轮联赛入面，艾兰加平均每次扭波嘅推进距离达到14.4米，比第2名狼队嘅马菲奥斯根夏多出1.2米，呢位瑞典国脚经常以一己之力进行反击，狂爆对手防线，将会成为森林嘅反击最强武器。