曼联今个夏天放走「金手套」迪基亚，高价签入喀麦隆门将奥拿拿把关，呢个决定引嚟唔少球迷质疑。虽然曼联领队坦哈格主要睇中奥拿拿嘅脚下功夫，不过佢今场嘅传球数据亦相当肉酸，加上5场失10球嘅纪录，难怪利物浦名宿加历查都忍唔住踩多两脚。

自开锣战对狼队保持不失，奥拿拿近4场联赛狂失10球，而且系自1979年後，曼联第1次连续4场联赛失2球或以上，今季扑救成功率只有65%，明显喺水平以下。就连奥拿拿最引以为傲嘅传送能力，今场都完全失灵，传球成功率只有69%，其中13次长传只系得2次成功，做唔到坦哈格战术嘅要求。

利物浦名宿加历查日前批评奥拿拿，指佢喺季前热身赛大闹哈利马古尼，系「做Show」嚟讨好曼联球迷，随後受到加利尼维利等曼联名将反击，叫佢「唔好蒲头」。睇到奥拿拿对白礼顿嘅表现後，加历查再「上水」话：「今场之後更加要讲多两句，搵人叫佢唔好成日向队友指手划脚，留番对手嚟救波啦！」