欧联分组赛周三(20日)凌晨展开，相隔20年後再战欧联嘅英超劲旅纽卡素，作客0比0守和意甲嘅AC米兰，喺「死亡F组」拎到宝贵1分。纽卡素今场唔输多得门将尼克普比，佢喺上半场6分钟曾作出5连救，领队艾迪侯域赛後表示：「世界上冇几多个龙门做得到。」

纽卡素20年未踢欧联，回归首战即作客圣西路球场，一开波就被主队压住打，AC米兰全场有8次中龙埋门，当中6次系喺上半场出现，其中第13分钟开始嘅一段6分钟围攻，纽卡素门将尼克普比就作出5次扑救，先後挡出普比加、卓禾夫、基奥特、拉迪高历同迪奥靴南迪斯攻门，其中迪奥靴南迪斯嘅8码飞顶更系超级黄金机会。

纽卡素捱过上半场嘅适应期後，换边後企稳阵脚防守有所改善，补时阶段桑恩朗达夫嘅射门被仅仅救出，几乎为「喜鹊」偷鸡成功，最终两队踢成0比0平手。「死亡F组」另一场赛事，巴黎圣日耳门由基利安麦巴比同阿舒拉夫各建一功，主场2比0击败多蒙特。

纽卡素领队艾迪侯域赛後激赞尼克普比：「普比真系冇得顶！世界上冇几多个龙门做到佢今场嘅扑救，而且佢喺压力下嘅分波亦都好出色，我哋条防线发挥得唔错，但普比对呢场『零封』作出极大贡献。」对於苦战下力保1分，艾迪侯域表示：「欧联系全新嘅体验，圣西路嘅气氛非常炽热，每人都有自己意见，但我唔觉得呢1分系运气。」