西班牙门神迪基亚今夏争议性离开曼联，原本以为拎住英超「金手套」之名皇帝女唔忧嫁，点知「失业」近2个月仍然冇班落。英国《每日邮报》报道，迪基亚只希望为有力争重要锦标嘅球会担正，如果搵唔到合适球会，将考虑提早收山。

迪基亚上季英超有17场「零失球」，勇夺英超金手套，但系曼联领队坦哈格最终决定将佢放弃，决心引入奥拿拿实践佢嘅传控足球理念。据报迪基亚近2个月有唔少斟介，但多份沙特球会聘约都畀佢拒绝，华伦西亚同贝迪斯嘅斟介亦冇晒下文。

皇家马德里同拜仁慕尼黑都曾经传出想搵迪基亚，不过最後都转移目标，《每日邮报》指32岁嘅迪基亚唔想去次级球会，而且亦要确保正选位置，如果最後真系搵唔到球会落班，就会结束15年嘅职业足球生涯。