仍未有班落嘅英格兰球星连格，近日同沙特球会伊蒂法克签1个「训练合约」，教练谢拉特将会考察连格呢段「试脚」时间表现，有机会正式签约，继续打造「英伦班底」。

30岁嘅连格夏天约满诺定咸森林後，一直未有着落，佢周六(23日)喺社交网自贴坐飞机去杜拜嘅相片，据转会权威Fabrizio Romano消息，连格同意去伊蒂法克训练1个月，教练谢拉特将会视乎表现决定系咪同佢正式签约。

伊蒂法克今季联赛表现出色，7场联赛有5胜1和1负，只系落後榜首伊蒂哈德2分。连格去到伊蒂法克会见到唔少「自己友」，除教练谢拉特系英格兰人之外，仲有英格兰国脚佐敦轩达臣、苏格兰国脚积亨特利，同埋英格兰出生嘅牙买加国脚迪马雷格雷。