踏入欧洲赛开锣，一众强队又要多线作战。当中阿仙奴相距6年再战欧联，分组赛首仗主胜大炒燕豪芬，搞到笔者身边嘅阿仙奴球迷不知几兴奋。

阿仙奴除咗进攻多瓣数外，仲要入球分布广泛。睇嚟阿迪达都唔会好似季初咁将个阵转嚟转去，好似依家咁咪几好，三线平衡分工清晰，加埋球员极高执行战术能力，今晚主场同热刺合演「北伦敦打吡」，「厂迷」当然希望完场後可以继续开心。

不过热刺今届表现亦对办，攻守兼备之余，更衣室士气亦相当好，阿仙奴今晚想拎晒3分唔系咁易。前锋孙兴民担任队长後联赛5场入3球，新加盟嘅占士麦迪臣极度融入球队，完全消化晒哈利卡尼离队嘅不利因素，所以呢场打吡一定好睇过戏。