巴黎圣日耳门(PSG)喺周一(25日)凌晨法甲大战，主场以4比0大破马赛，不过王牌前锋基利安麦巴比因足踝受伤，踢唔够半场就退下火线，未知赶唔赶得切下星期欧联对纽卡素上阵。

开季表现麻麻嘅PSG，今仗主场表现勇猛，8分钟就靠阿舒拉夫妙射罚球领先，虽然基利安麦巴比喺32分钟受伤被换走，但PSG火力未有减弱，高路梅安尼37分钟再下一城。入替麦巴比嘅葡萄牙前锋干卡路拉莫斯，下半场发威梅开二度，协助PSG大胜4比0完场。

麦巴比返到後备席後，一直由军医治疗左脚足踝问题，PSG教练安历基赛後表示：「伤势唔严重，不过佢觉得痛楚，所以换走佢系合适做法，佢会冇事。」PSG会喺周六(30日)对克莱蒙特，下周中就喺欧联作客纽卡素，麦巴比赶唔赶得切上阵仲系未知数。