法甲豪门巴黎圣日耳门(PSG)今夏豪花5,000万欧元(约4.1亿港元)向巴塞隆拿收购翼锋奥士文尼迪比利，代替美斯嘅位置，但效果欠佳，呢位26岁法国国脚为PSG上阵6次，冇入波亦冇助攻，沦为「006」，盛传会方计划明年1月冬季转会市场重开後，将佢外借去英超。

PSG原本有意借用马体会前锋祖奥菲历斯，但呢位葡萄牙国脚最终加盟巴塞隆拿，并有出色表现，包括射入3球及2次助攻。反观PSG向巴塞签入嘅奥士文尼迪比利，却6战0入球0助攻，被网民嘲讽眼光太差，亦令迪比利前途亮起红灯。

英国《镜报》爆料指「伦敦双雄」阿仙奴同热刺都有意喺明年1月向PSG借用奥士文尼迪比利，特别系热刺失去射手哈利卡尼之後，渴望签入进攻球员，认为奥士文尼迪比利系合适人选。不过，距离冬季转会市场重开仍然有一段日子，如果奥士文尼迪比利表现回勇，PSG可能放弃外借计划。