周一(25)凌晨英超上演大屠杀，纽卡素作客8比0狂数新升班嘅锡菲联，而且「喜鹊」今场8个入波嚟自8个唔同球员，系英超史上首次出现同队单场「八星报喜」嘅场面，认真犀利！

纽卡素上周中踢完欧联，不过球队未见疲态，21分钟由桑恩朗达夫入波揭开屠杀序幕，丹般恩同保治文上半场各入1球，纽卡素半场领先3比0。换边後纽卡素愈踢愈有，哥林威尔逊、安东尼哥顿、米基尔阿米朗、般奴古马雷斯同阿历山大伊沙克轮流入波，最终纽卡素大胜8比0，创下球会史上英超最大作客胜仗。

8个入波由唔同球员攻入(唔计乌龙波)，亦创下英超纪录，车路士(2012年)同曼联(2021年)都试过单场有7个球员入波。纽卡素领队艾迪侯域赛後表示：「我从来冇怀疑纽卡素嘅进攻能力，球队有好多出色进攻球员，我哋开季赛程好困难，不过今场球员努力寻找入波，我咃好尊敬锡菲联，今场只系做好我咃争取入球嘅本份。」