阿仙奴周日(24日)英超两度领先下被热刺逼和2比2，而且赔了夫人又折兵，今季加盟後表现出色嘅迪格兰赖斯，半场因伤提早退下火线，领队阿迪达亦承认伤患「唔寻常」。阿仙奴目前有5个主力球员受伤，密集赛程有排捱。

阿仙奴对热刺半场换走迪格兰赖斯，阿迪达赛後表示：「佢觉得背部有唔妥，上半场嗰阵佢已经提出，半场检查发现佢唔踢得，所以一定要换人。以迪格兰赖斯嘅性格，主动提出有唔妥系唔寻常，希望唔会休息好耐，我哋要再检查睇下。」

喺对热刺前嘅操练，比利时翼锋李安度杜沙特亦受伤缺阵，加上汤马士柏迪、祖利安添巴同加比尔马天尼利都养紧伤，5位主力球员都唔能够候命。阿仙奴周四(28日)凌晨会喺英联盃作客宾福特，周六(30日)再喺英超作客般尼茅夫。