车路士夏天用3,200万镑(约3.2亿港元)收购塞内加尔前锋尼高拉斯积逊，原本指望佢解决球队入球能力不足问题，点知佢开季失机频频，6场联赛只得1个入波，但就拎到5张黄牌要自动停赛，而且呢5张黄牌全部都系因为投诉或不君子行为而「自己申请」，令人失望。

英超今季严格禁制球员对球证不敬，不过22岁嘅尼高拉斯积逊就唔醒水，今季4次因为同球证拗撬而食黄牌，周日(24日)对维拉又因为阻住门将开波，拎到今季6场联赛第5张黄牌，将会自动停赛1场，领队普捷天奴都颇有微言。

车路士领队普捷天奴赛前曾表示：「我哋有倾过黄牌嘅问题，一个前锋因为向球证投诉而拎4张黄牌......要拎黄牌都要拎得更有价值，而唔系因为无谓原因，如果再系咁，佢会令球队陷入困难。尼高拉斯积逊仲後生，佢需要学习，佢会成为一个出色球员。」