西甲劲旅巴塞隆拿近年因为财困，非常积极争取签入自由身球员，以节省转会费支出，根据西班牙《每日体育报》爆料，巴塞隆拿最新睇中英冠球队李斯特城中场尼迪迪，计划等呢位26岁尼日利亚国脚明夏约满後，免转会费签入佢。

李斯特城今季降落英冠，有多位主力离队，包括中场占士麦迪臣转投热刺、哈维班尼斯转投纽卡素，虽然尼迪迪随队降班，但拒绝续约，估计佢想等明夏约满离队。由於尼迪迪明年1月就可以同其他球会倾加盟事宜，据悉巴塞打算出手斟介佢。

不过有分析指巴塞睇中尼迪迪，并非想重用佢，唔排除免费签入佢之後，等一年再转售图利，情况就好似上年夏天签入自由身嘅科特迪瓦国脚基斯尔，今夏将佢出售畀沙特球队吉达艾阿里，获得1,250万欧元收入，所以尼迪迪加盟巴塞隆拿之前，真系要三思。