周四(28日)朝早美联盃决赛，国际迈亚密喺阿根廷球王美斯缺阵下，以1比2不敌侯斯顿戴拿模失落冠军。

美斯今个夏天加盟後，国际迈亚密由鱼腩变成劲旅，先赢北美联赛盃冠军，再杀入美联盃决赛，不过今仗斗侯斯顿戴拿模，伤患未愈嘅美斯只能够便服出席观战，同碧咸、施丹及NBA球星占士夏登等齐齐喺观众席睇波，加上西班牙球星佐迪艾巴亦受伤，令国际迈亚密打回原形。

国际迈亚密缺少美斯下，进攻组织唔到有威胁攻势，更因後防甩漏喺上半场连失2球，换边後虽然奋力进攻，但要到补时阶段先靠祖斯夫马天尼斯破蛋，可惜为时已晚，侯斯顿戴拿模赢2比1捧盃。

国际迈亚密下个目标系美职季後赛，但佢哋依家排东岸尾2，落後第9名嘅纽约城5分但踢少2场，仍然有机争夺季後赛附加赛资格，不过前提系要美斯尽快复出，否则国际迈亚密凶多吉少。