今晚英超独脚戏，诺定咸森林主场硬撼宾福特。虽然森林一向靠主场搵食，但箭头艾禾尼尔跌Watt影响攻力，宾福特3连败陷低潮，今仗作客会先做好防守，2.5球入球细系明智之选。（Now 621周日晚9时直播）

森林上季能够护级成功，全靠主场威力，上季取得嘅38分中，有30分系来自主场，今季开咧後打咗两场主场联赛，亦获得1胜1和。不过佢哋嘅数胡人物艾禾尼尔脚风欠顺，近3仗联赛都食白果，森林呢3仗只入2粒，攻力受削，主帅谷巴惟有稳阵行先，各项赛事近4仗，虽然仅1胜及失咗4球，但其中2粒系失畀曼城，嗰场波仲系早早失咗呢两球後，森林未有自乱阵脚，反而顶住「蓝月亮」狂轰猛炸，之後对手打少个下，最终仅输0比2，虽败不辱，而呢4仗全开2球或以下，防守回稳。

另边厢，宾福特各项赛事近6仗法定时间未赢过，上次赢波已经系8月中联赛击败富咸，单计近3仗更加全部输晒，包括输畀弱旅爱华顿，表现惨不忍睹。宾福特最大问题系防守不稳，开咧後打咗8场，只有1仗冇失波，为咗止跌，今仗作客先巩固防守，唔敢轻举妄动。既然双方状态麻麻，相信都会踢稳阵波，今仗唔慌多波入，细盘有计。