曼联周六(29日)英超主场0比1输畀水晶宫，系球会自1989年後首次喺开季7轮联赛输4场，领队坦哈格赛後直指成绩「不能接受」，亦都冇任何藉口可以用。英国名嘴皮尔斯摩根赛後亦再向坦哈格发炮，指赶走C朗拿度嘅坦哈格先系曼联真正毒瘤。

曼联主场输波後，奥脱福球场出现极大嘘声，坦哈格赛後表示：「我明白(球迷嘘声)，唔系对对手不敬，曼联无论主场定作客对住水晶宫都应该赢波。球迷期望我哋今场会赢，但系我哋做唔到，我可以畀出好多输波原因，但你哋会觉得系藉口，而曼联依家咁嘅成绩系冇藉口。」

因力撑老友C朗而狙击坦哈格嘅皮尔斯摩根，赛後喺社交网贴出当年坦哈格同C朗喺後备席嘅相片，留言话：「呢两个人有一个被逼走，因为佢被视为球队嘅『毒瘤』，遗憾嘅系真正毒瘤另有其人......(线索：毒瘤唔系C朗)。」