周六(30日)英超赛事，衞冕嘅曼城作客1比2输畀狼队，虽然仍以18分排喺榜首，但全胜走势同不败身都被打破。今场为狼队射入致胜球嘅南韩前锋黄喜灿，赛前被哥迪奥拿以「南韩仔」嚟形容，被指有欠尊重，呢个入波相信会令哥迪奥拿记得佢个大名。

曼城今场有洛迪卡斯简迪停赛，哥迪奥拿亦累积黄牌唔能够喺场边指挥，开波13分钟就有鲁宾戴亚斯摆乌龙先落後，虽然祖利安艾华利斯58分钟追平，但狼队喺66分钟就由黄喜灿禁区内连环射门得手，曼城最终输1比2完场。

有趣嘅系，哥迪奥拿赛前点名赞狼队嘅进攻球员话：「对狼队好难打，睇下佢哋嘅前锋，有柏度尼图、马菲奥斯根夏同嗰个南韩仔，佢哋都非常非常出色。」虽然哥迪奥拿系赞紧，但狼队球迷觉得用「南韩仔」嚟形容黄喜灿系唔尊重，当黄喜灿入波後，狼队官方社交网亦特别标注「南韩仔」，明寸哥迪奥拿。