比利时球星夏萨特今夏离开皇马之後，仍然未有球会收留，根据法国《队报》爆料，呢位中场即将复出，但只系踢慈善赛，同迪甘斯、白兰斯等超过50岁嘅名宿做队友，网民纷纷慨叹32岁嘅夏萨特已经沦落到要踢「元老赛」。

今场慈善赛将於10月18日喺法国举行，夏萨特将为一支名为Varietes Club de France嘅球队上阵，呢支球队1971年成立，目的系云集一班球坛名宿踢慈善赛，每年大约踢40场。夏萨特今次获邀加入，同多位曾经夺得世界盃冠军嘅名将做队友，包括54岁嘅迪甘斯、57岁嘅白兰斯，2人球员时代曾协助法国夺得1998年世界盃冠军。

睇番38岁C朗、36岁美斯现时仍然保持勇态，反观32岁嘅夏萨特已经要踢「元老赛」，实在令人唏嘘。不过，夏萨特曾经透露可能会挂靴，或者心境上已经属於「元老级」。