周三(4日)凌晨欧联赛事，英超双雄齐齐冧档，曼联主场输畀加拉塔沙雷之外，阿仙奴喺B组亦作客1比2不敌朗斯，最惨系主将布卡约沙卡上半场伤出，好可能会缺席周日(8日)主场对曼城嘅英超关键大战，赔了夫人又折兵。

阿仙奴今场未有为斗曼城留力，不过整体表现麻麻，14分钟藉朗斯後防犯错，由加比尔捷西斯射入领先；25分钟阿仙奴门将大衞拉耶长传被截，艾迪恩汤马臣妙射将比赛追平。阿仙奴之後有布卡约沙卡受伤离场，69分钟再被朗斯前锋艾尔华希偷袭得手，尾段阿仙奴围攻但入唔到波，结果输1比2完场。

阿仙奴喺B组2战得3分排喺第2位，但更令人担心嘅系星期日对曼城嘅赛事，领队阿迪达赛後表示：「沙卡想交後肘但觉得有唔妥，可能系肌肉问题，我目前只系得咁多资讯，嚟紧联赛踢唔踢得我真系唔知。」对於今场败仗，阿迪达就话：「喺欧联要作客赢波系好困难，我哋上咗宝贵一课。」