国际足协会长恩法天奴周四(5日)证实，2030世盃决赛周将由西班牙、葡萄牙同摩洛哥联合举办，不过为纪念世盃「100周年」，呢届赛事头3场比赛会安排喺乌拉圭、阿根廷同巴拉圭3国举行，意味2030世盃会有6队主办，横跨欧洲、非洲同南美洲。

恩法天奴表示：「喺一个分裂嘅世界，国际足协同足球团结起嚟，理事会一致同意用最合适方法庆祝百周年世盃。世盃喺1930年由乌拉圭首次举办，所以会喺南美洲举办庆祝活动，揭幕战安排喺100年前首场世盃举行嘅地方(蒙得维的亚)。」

据报欧洲足协、非洲足协同南美洲足协过去几个月一直秘密商讨，计划最终获国际足协理事会通过，避免冗长嘅申办过程，而6个有份主办嘅国家亦会自动跻身决赛周，南美洲原本有6个直接出线名额，呢届将会减少至3个。