热刺今季喺新帅普斯迪高路执教下，开季成绩非常突出，7轮赛事拎到5胜2和，同阿仙奴成为今季仅余两支不败之师。热刺周日(1日)喺VAR犯错下击败利物浦，不过佢哋攞完着数都唔面红，阿根廷中坚基斯甸罗美路赛後更同同乡阿历斯麦亚里士打网上驳火，叫该利物浦中场：「返屋企喊啦！」

热刺赢波後升上联赛第2位，基斯甸罗美路赛後喺社交网贴文：「呢支球队有顶级士气、顶级雄心，热刺上下永远团结一致。」作为阿根廷国家队队友嘅利物浦中场阿历斯麦亚里士打，就好唔客气踩场留言：「当你踢紧12个人就好正常。」讽刺热刺获得球证偏帮而赢波。

面对阿历斯麦亚里士打挑机，基斯甸罗美路亦唔输蚀回应：「返屋企喊啦！」至於热刺领队普斯迪高路赛後就表示：「我哋明白比赛系会有错误，包括球证，大家都误以为VAR系零犯错，好多规则都需要球证演绎，而人类就系会犯错，呢个系足球比赛一部份。」