周日(8日)晚英超前列大战，阿仙奴主场对曼城，亦系两军主帅兼师徒阿迪达同哥迪奥拿大斗法，最终阿仙奴凭住加比尔马天尼利射门省中尼敦阿基破网，以1比0击败曼城，亦系「达Sir」喺联赛对师傅哥迪奥拿首场胜仗。

阿仙奴有翼锋布卡约沙卡因伤连後备都冇份，令前线火力大打折扣，曼城虽有中场洛迪卡斯简迪停赛，但一开波即被曼城控制战局，先有加华度尔近射畀迪格兰赖斯护到空门，解围不远轮到尼敦阿基埋门高出，之後门将大衞拉耶大脚解围，弹中祖利安艾华利斯几乎入网，抹一把汗。不过曼城逼抢非常凶狠，其中高华锡从後踩中马田奥迪加特，竟然只罚黄牌唔使领红，认真好彩，冇耐佢又侵犯迪格兰赖斯连黄牌都冇，球证奥利华嘅执法尺度真系好难估，半场互交白卷。

阿仙奴主帅阿迪达见势色唔对，易边後即换入刚伤愈嘅加比尔马天尼利，佢入场冇耐开出角球，几乎造就加比尔马加希斯顶入，加比尔捷西斯近射又被闩出。曼城主帅哥迪奥拿一口气换入史东斯、谢利美杜古同马菲奥斯纽尼斯，冇耐阿迪达见师傅变阵，佢亦一次过换入汤马士柏迪、夏维斯同富安健洋，收到奇效，86分钟富安健洋弹畀夏维斯，後者再二传畀马天尼利劲射，省到尼敦阿基入网，协助阿仙奴击败曼城，「达Sir」接手阿仙奴後，之前12次联赛对住哥帅嘅曼城全败，今次首赢师傅真系威番铺，现时同榜首热刺同分，只因得失球差排次席。