周六(7日)晚英超，史达宁大爆发创造3球，协助车路士作客以4比1反胜般尼，以行动证明英格兰主帅修夫基弃用佢系错误决定。车仔各项赛事取得3连胜，呢支「亿万大军」已经重回正轨，并且来势汹汹，令今季争标形势更加激烈。

般尼开赛15分钟靠1次快速反击，由奥度拔射入打开纪录，但之後成为史达宁表演时间，佢喺上半场末段，左路突破之後传中，导致般尼中坚艾达希摆乌龙。

换边後冇耐，史达宁再次利用个人突破能力，杀入禁区博到对手域天奴犯规，获得12码，由高尔彭马主射入网，协助车路士反超前2比1，呢位今季由曼城来投嘅新星以21岁零154日成为车仔史上第2年轻喺英超射入12码嘅球员。

史达宁间接创造2个入球後，65分钟自己射入1球，跟住高尔彭马传畀尼高拉斯积逊射成4比1，继英联盃击败白礼顿及上仗英超赢富咸後，取得3连胜。

史达宁今季表现大勇，但再次落选英格兰国家队，好多球迷替佢不值，赛後呢位28岁翼锋话：「我唔需要证明自己嘅能力，我哋先失波，但并冇放弃，之後愈踢愈顺，交出精彩表现。」领队普捷天奴话，好开心球员已经建立信心，并不断进步。