因上年初卷入家暴事件，今夏被曼联外借基达菲嘅格连活特，周一(9日)凌晨攻入佢喺西甲第1球，亦系呢位英格兰前锋自22年1月对宾福特入波後，相隔628日再尝入波滋味，并协助基达菲作客2比2打和切尔达。

格连活特今场正选上阵，佢嘅拍档马约莱尔2分钟先开纪录，切尔达喺24分钟追平。基达菲30分钟有杜明高斯杜亚踢食红牌，踢少个下格连活特发威，33分钟抽入加盟後第1球，可惜捱唔到半场又被切尔达追平，下半场两队互无纪录，最终2比2打和。

格连活特赛後喺社交网表示：「好开心拎到基达菲第1个入波，喺呢场波拎番1分，全队展现出高昂士气！」格连活特今季西甲第5次上阵，今场系第2次正选，状态不断提升。