车路士两位过亿欧元球星，阿根廷安素费南迪斯，同厄瓜多尔摩西斯卡些度，近日返到所属国家队披甲，齐齐喺世盃外南美洲区赛事交出好表现，帮助阿根廷同厄瓜多尔赢波，表现回复正常。

安素费南迪斯今年初由宾菲加转投车路士，转会费高达1.21亿欧元，加盟以来冇乜表现，仲试过12码宴客，不过返到国家队就唔同讲法，今仗世盃外，顺利协助阿根廷主场赢巴拉圭1比0，「安仔」虽然冇入波亦冇助攻，但就有82%成功传送率，同埋2次关键传送，活跃范围覆盖中场同左路，攻守兼备。

摩西斯卡些度今夏以1.16亿欧元由白礼顿过档车路士，帮唔到手之余仲试过输12码，但佢喺国家队同样展示实力，今场厄瓜多尔对玻利维亚，卡些度交出2个助攻，协助球队赢2比1，连同上场反胜乌拉圭送出1个助攻，两场3助攻表现出色。

两位中场合共使咗车路士2.37亿欧元，佢哋喺国际赛亦证明自己身价，但一返到车路士就冇料到，值得车仔主帅普捷天奴深思。