拉素今季开局唔理想，队长兼射手恩莫比尼6战仅入2球，表现备受批评，有人建议应该重用新援卡斯迪兰奴斯，令恩莫比尼感到受伤害，萌生离队念头，打算接受沙特巨额报价，去当地搵真银。

《thelaziali》报道，恩莫比尼效力拉素第9个球季，同蓝鹰度过多次高低起跌，今年夏天即使收到来自沙特嘅巨额报价，两年3,500万欧元(约2.88亿港元)合约，佢都不为所动，仲同拉素续约至2028年。

点知今季拉素开局成绩唔理想，球迷就开始针对佢，恩莫比尼坦言：「我感觉受伤害，啲人已经唔记得，当初我加盟拉素时，队波乜都唔系，依家我哋有得打欧联，就想踢走我？」

「我开始动摇，依家嘅谂法同7月已经唔一样，有时我会谂『如果我离开咪仲好』。」33岁嘅恩莫比尼已经萌生离队念头，虽然佢喺拉素攞紧顶薪嘅400万欧元(约3,300万港元)，但同沙特比可以话冇得比，如果对方再招手，相信恩莫比尼会立即应承。