英超劲旅阿仙奴近年锺情巴西兵，巴西籍总监伊度系重要原因，呢位阿仙奴高层近日趁国际赛期飞返巴西访问多间球会，日前就现身富明尼斯，有消息指佢睇中22岁中场特林达迪，准备喺利物浦手上抢签呢位巴西新晋国脚。

有份入选巴西最新一期大军名单嘅特林达迪，原本夏天有机会加盟利物浦，但富明尼斯拒绝季中放人，有传利物浦会喺1月再度出手，不过巴西传媒爆，阿仙奴已加入战团，而且特林达迪合约内有买断条款，转会费约2,150万镑(约2.15亿港元)。

传闻曝光後，阿仙奴总监伊度日前又喺富明尼斯现身，呢支巴甲劲旅官方社交网亦贴出伊度到访相片，伊度并大赞球会嘅青训设备，唔少球迷都指伊度此行「点止参观咁简单」。伊度喺2019年做阿仙奴总监前，曾经喺哥连泰斯同巴西国家队担任技术官员。