周三(18日)朝早世盃外南美洲区赛事，巴西作客乌拉圭惨输0比2，是非多多嘅王牌球星尼马完半场前严重受伤，要由担架床抬走，呢位前锋离开球场嗰阵掩面痛哭，怀疑伤及膝头韧带，好可能要缺阵一段长时间。

巴西上场被委内瑞拉逼和後，尼马曾被球迷掟爆谷发泄，之後又爆出同云尼斯奥斯祖利亚、李察利臣赛前通宵「夜会名模」事件，不过今场只有李察利臣被贬後备，但面对乌拉圭严密布防，几乎冇制造任何到肉攻势，42分钟更被乌拉圭前锋达云纽尼斯接应传中头槌攻陷。

完半场前一刻，尼马中场争波同对手碰撞後，左脚落地摆伤膝头，佢即时痛苦倒地示意受伤，经军医长时间治疗後要由担架床抬走，尼马神情痛苦兼掩面痛哭；巴西失去主力後，下半场再失1球，最终0比2输波，今届外围赛首尝败仗。

巴西队长卡斯米路赛後表示：「我哋要面对现实，尽快搵出改善表现嘅方法，尼马嘅伤肯定系严重，希望唔系最坏嘅情况。尼马每次进入状态都会受伤，实在令人难过。」