车路士近年大洒金钱收购球星，但多数表现货不对办，反而最佳收购系「土炮小将」高尔彭马，呢位21岁英格兰中场今夏由曼城转投车路士後，各项赛事上阵10场创造7个入波，包括射入3球及4次助攻，周一(13日)凌晨英超倒戈斗曼城，势必做出好戏，令「蓝月亮」主帅哥迪奥拿後悔。

车路士今季成绩欠佳，踢11场英超仅4胜，但并未掩盖高尔彭马嘅光芒，成为队内表现最抢眼进攻球员，并喺大战发挥重要作用，包括上月英超对阿仙奴，射入12码为车路士先开纪录，上场对热刺，佢再次主射12码入网及贡献1次助攻，成为球队大胜嘅功臣，车仔用4,000万镑(约3.8亿港元)买到呢位新星，绝对物超所值。

高尔彭马表现出远超其年龄嘅心理质素，所以领队普捷天奴委任佢做首席「刽子手」，负责主射12码，老大哥史达宁早前想抢射12码，都唔成功。

相比起效力曼城期间只能喺「垃圾时间」上阵，高尔彭马今季为车路士10次披甲有7次担任正选，奠定主力地位，事业取得重大发展，嚟紧斗曼城，高尔彭马更加要趁机显功架，证明哥迪奥拿走漏眼。