周日(12日)英超赛事，利物浦主场3比0大破宾福特，状态大勇嘅穆罕默德沙拿今场又入2球，英格兰生涯入球达到200大关，领队高普赛後对呢位埃及前锋赞不绝口。

利物浦今季重现霸气，今仗一开波就狂攻，达云纽尼斯2度入波食诈胡，直到39分钟沙拿右路熨射远柱死角入网。利物浦领先後愈踢愈顺，62分钟沙拿接应森美卡斯传中顶入，而迪亚高祖达就喺74分钟埋斋，协助利物浦大胜3比0，依家同阿仙奴同得27分，落後榜首嘅曼城1分。

沙拿今场梅开二度後，英格兰生涯总入球(所有赛事)达到200大关，当中198球系喺利物浦攻入，另外2球系为车路士建功，高普赛後表示：「好疯狂！喺英格兰入200球真系冇得顶，佢经常都面对2个人夹击，仍然可以保持控球，佢今仗表现非常精彩。」沙拿连续15场英超主场交出入波或助攻，亦系亨利同舒利亚後第3人，堪称系英超传奇。