车路士夏天用4,500万镑(约4.3亿港元)向曼城签入新星高尔彭马，唔够3个月就被誉为今季最佳收购之一。21岁嘅高尔彭马今场倒戈尽显身价，主宰车路士进攻兼轰入关键12码，比赛期间更「搞搞震」，既出古惑踩烂12码草皮而食黄牌，又「偷听」曼城球员商量战术而被推开，相当抢戏！

哥迪奥拿赛前透露，高尔彭马因为「唔想再等」，希望即时成为正选而坚持转会，哥帅更豪言：「只有小球会先至会担心卖好球员畀对手。」高尔彭马今仗就大发神威，录得7次成功穿越去前场嘅传球(全场最高)，补时最後一刻更顶住压力，轰入今季个人第4个12码(100%命中)，高尔彭马赛後表示并冇苦练12码：「我只系对自己能力好有信心。」

高尔彭马入波後并冇大事庆祝，以示对母会尊敬，不过佢其实喺比赛中出咗唔少古惑，就喺艾宁夏兰特博到第1个12码嗰阵，高尔彭马趁VAR检查嘅时间，故意走去12码点踩烂草皮，结果被球证发现而食黄牌；完场前曼城禁区外有罚球机会，当曼城球员讨论战术嗰阵，高尔彭马又静静鸡企埋去偷听，艾宁夏兰特发现後即好大力咁将佢推开，认真搞笑。