周一(20日)凌晨欧国外A组赛事，西班牙主场3比1击败格鲁吉亚，顺利以首名出线决赛周，不过佢哋付出嘅代价非常沉重，巴塞隆拿中场加维喺上半场伤出，初步检查发现膝部韧带严重受伤，唔单止今季可能提早收咧，甚至乎有机会错过明年夏天嘅欧国盃决赛周。

西班牙今场开局顺利，拿洛文特4分钟就头槌入波开纪录，不过格鲁吉亚6分钟後即由基华拉斯基利亚追平，上半场中段加维喺一次争抢右膝拗伤，即时痛苦倒地兼唔能够继续作战，虽然可以自己行出球场，但就全程强忍泪水，明显知道伤势非常严重。

西班牙下半场再发力，费伦托利斯55分钟建功後，拎出加维件波衫向佢致敬，72分钟格鲁吉亚球员摆乌龙，令西班牙锁定3比1胜局。西班牙喺A组以8战7胜成绩首名出线，苏格兰就以小组次名身份晋级决赛周，但加维嘅伤势无疑系今场焦点。

西班牙军医初步检查後，怀疑19岁嘅加维右膝十字韧带撕裂，如果详细检查证实判断属实，加维今季好大机会提早收咧。西班牙领队富安迪表示：「情况睇落好严重，加维好担心，今场系我经历过最难过嘅胜仗，球队上下都心碎，感觉就好似输波一样。」