欧国外A组最後一轮，「斗牛兵团」西班牙主场迎战格鲁吉亚。西班牙虽然提早2轮出线，但佢哋仍然要争取决赛周第一档种子资格，避免同强队一组，今场要赢之余，仲要入多几球，加上主场出击，相信一开波就会抢攻，1.5球半场大玩得过。（周一凌晨3时45分开赛）

现时西班牙以18分於A组领先，苏格兰以16分紧随其後，数字上「斗牛兵团」仍未肯定取得首名资格。大家可能会话，西班牙都出咗线，呢场肯定会hea踢，但其实佢哋仲要争决赛周第一档种子资格。

决赛周分为6组，24队分4个档次抽签，主办国德国已经霸咗一个第一档种子位，西班牙要成为外围赛小组首名之余，仲要抢做最佳成绩嘅5队，咁样就可以攞到种子位，唔使惊同其他强队抽中同一组，影响出线机会。

事实上，上场作客弱旅塞浦路斯，西班牙领队富安迪留有一手，正选起用大部分年轻球员，艾华路莫拉达、费兰托利斯、大衞加西亚等主力，喺上半场已经早早领先3球下，下半场先出嚟轻舒脚头，摆明留力今晚喺主场球迷面前献技，相信会大胜一场，期待锁定首名之余，亦攞到决赛周第一档次种子资格。

格鲁吉亚早早无出线机会，但无压力之下反而发挥不俗，上场同苏格兰踢成2比2，仲要一度领先2比1，到补时先畀对手逼和，今场相信都系唔怕西班牙，放手一搏，加上格鲁吉亚近4场作客，3次半场开2球或以上，半场大值得留意。