意大利喺欧国外以5比2击败北马其顿，出线形势占先机，但期间重演上届世盃外「悲情一幕」，主角又系「败家仔」佐真奴，呢位中场再次射失12码，最令人睇唔过眼系佢仲未吸取教训，再次用「小跳步」射法，结果冇力度又冇角度，犹如传波畀对手门将，若然下场生死战对乌克兰，意大利又获得12码，相信领队史巴列堤应该会禁止佐真奴主射。

佐真奴以「小跳步」射12码闻名，曾经命中率非常高，呢种踢法主要想「欺骗」门将起动先，然後再拣射门方面，所以往往力度同角度欠奉。佐真奴呃得人多，对手当然唔会再轻易上当，佢近4次为意大利主射12码都宴客，包括上届世盃外2次对瑞士都射失，成为意军出局主因。

来到今场欧国外关键一战，佐真奴仍然用「小跳步」射法，而且射得比以前更差，明显信心不足，唔少球迷都批评佢死性不改，唔正正经经劲抽入网，系要玩花巧，幸好意大利今仗赢波，否则佐真奴肯定再次成为国家罪人。