日前一场英超U16赛事，阿仙奴15岁前锋奥比马田个人独取10球，带领阿仙奴U16以14比3狂数利物浦U16，呢场神奇比赛亦引起各界关注，据报英格兰足总已打算「抢人才」，希望可以喺丹麦手上召入呢位明日之星。

司职前锋嘅奥比马田只有15岁，但身高已经有1米88，上年加入阿仙奴青训後备受好评，丹麦媒体形容佢踢法似域陀奥森汉，今个月初更获领队阿迪达邀请去跟一队操练，证明球会对佢非常器重。日前喺U16联赛对利物浦连入10球，令佢人气急升。

奥比马田分别代表过英格兰U16同丹麦U17，上个月亦代表丹麦出赛，但英国《每日邮报》爆料，英格兰足总正游说奥比马田代表英格兰，丹麦U17领队米高臣表示：「条例上佢系有权选择，但我唔担心，之前同佢家人倾过，话愿意代表丹麦出赛，不过如果最终改变主意，亦唔到我哋控制。」