曼联喺欧联作客加拉塔沙雷被逼和3比3，防守差劲责无旁贷，不过原来佢哋失第1个波失得好冤枉，事关薛耶治射入追成1比2嘅罚球前，莫路伊卡迪已违反人墙条例，按道理应该将入波作废。

国际足协喺19/20球季推出新例，列明防守方排出3人或以上嘅人墙嗰阵，攻方球员一定要同人墙保持至少1米距离，但据《beIN Sports》计算，薛耶治入波嗰阵，作为「反人墙」嘅莫路伊卡迪同人墙距距离只得61cm，所以入球唔应该成立，而系要判曼联获得间接自由球。

不过，呢条球例似乎唔系太多人知，而且球证亦甚少执法，好似2021年欧国联4强丹麦对英格兰，丹麦开纪录嘅罚球，「反人墙」就疑似闯入英格兰人墙嘅1米禁区，但球证同VAR都未有理会。