阔别欧联6季嘅英超劲旅阿仙奴，周四(30日)凌晨主场6比0狂数朗斯後，提前一轮锁定B组首名出线席位。统计显示，阿仙奴过去20次出战欧洲赛(15次欧联、5次欧霸)，全部都能够喺分组赛晋级。

阿仙奴今场大开杀戒，夏维斯13分钟先开纪录，打开缺口嘅「兵工厂」，喺21至27分钟再入多3球，加比尔捷西斯、布卡约沙卡同加比尔马天尼利各建一功，完半场前马田奥迪加特再入一球，带住5比0优势返更衣室。下半场朗斯加强防守，阿仙奴去到86分钟获得12码，佐真奴操刀射成6比0完场。

阿仙奴今场火力全开，成为首支喺欧联半场领先5球嘅英超球队，领队阿迪达赛後表示：「我哋知道今场可以完成任务，而球队用漂亮一仗嚟实现，我哋上半场攻入一支好好嘅球队5球，领先咁多好容易会失去专注，但我哋下半场仍然保持集中，各方面都有好嘅结果。」