曼联喺欧联大好形势下再度失分，出线机会变得非常渺茫，除咗门将奥拿拿「孭晒镬」之外，领队坦哈格嘅换人亦被指系球队崩溃原因之一，而呢位荷兰教头完场後笑晒口同旧部薛耶治聚旧一幕，更令曼联球迷睇到眼火爆！

曼联今仗头1个钟头表现唔差，当麦汤米尼55分钟射成3比1後，坦哈格就抢先揿掣，换走表现突出嘅海伦同苏夫恩岩拉伯特，但呢个调动就令控制战局嘅曼联突然失势，喺60分钟至75分钟被加拉塔沙雷压住踢，并且连失2球。数据显示，入替海伦嘅安东尼马迪尔，30分钟内只有2次喺对方禁区触球，明显入唔到局。

完场後曼联仲未知系咪提早出局，因为同组拜仁慕尼黑同哥本哈根仍未开波，不过坦哈格心情唔算太差，同对手射入2球嘅薛耶治更笑住咁拥抱，两人之前曾经喺阿积士合作，今次重逢当然趁机聚旧，不过曼联球迷见到就好不满，纷纷留言闹爆：「见到球队踢成咁，个领队仲笑得出？」、「如果领队系费格逊，佢会嬲到唔同人握手走番更衣室」、「究竟佢有几关心曼联嘅成绩？」