曼联领队坦哈格日前证实，球会正同4名季尾约满嘅球星云比沙卡、域陀连迪路夫、安东尼马迪尔及米积伯利，就新约问题进行商讨，不过据《The Athletic》爆料，曼联已否决同安东尼马迪尔续约，如果1月卖唔出，明年夏天就会畀佢自由身离队。

28岁嘅安东尼马迪尔喺2015年加盟曼联，但只有3季英超入波达到双位数字，表现令人失望，佢喺2019年同曼联续约5年，另有延长1年合约选项，但《The Athletic》消息指曼联决定唔会启动续约条款，畀佢好似迪基亚一样免费离队。安东尼马迪尔今季英超上阵13次只入1球，而且「散步式」防守踢法更引嚟球迷不满，坦哈格喺对纽卡素一战更即场指责，注定呢位法国前锋冇运行。

同安东尼马迪尔一样季尾完约嘅云比沙卡、域陀连迪路夫同小将米积伯利，佢哋合约内都有自动延长合约1年嘅条款，预料曼联会全部留用，而且唔排除会重新倾过一份更长嘅合约。