周日(17日)凌晨英超，纽卡素主场3比0大炒富咸，今仗胜负关键系22分钟，富咸前锋鲁尔占美尼斯起飞脚，虽然最後关头已经「收脚」，但由於动作太肉酸而被VAR要求改判红牌。富咸领队马高施华赛後批评球证偏帮纽卡素，直指鲁尔占美尼斯唔应该被逐。

今场双方斗得肉紧，但唔少判决都系偏向主队，22分钟鲁尔占美尼斯起飞脚，球证最初判黄牌，但VAR介入後改判红牌。纽卡素踢多过下，下半场凭利维斯米利、米基尔阿米朗及丹般恩各建一功，大胜3比0完场。利维斯米利更以17岁229日之龄，成为纽卡素史上最年轻英超入球球员。

鲁尔占美尼斯失控食红牌成为输波罪人，不过富咸领队马高施华就认为球证偏帮主队：「头21分钟，球证冇判过纽卡素任何犯规，而佢哋每次都拎到罚球，明显呢个球证唔够经验去应付主场嘅压力，纽卡素冇1次犯规被罚，甚至拿修斯开肘打鲁尔占美尼斯块面都冇事！鲁尔占美尼斯当时跳向对手，但冇任何严重嘅行为，黄牌系正确，VAR唔应该介入。」