英超王者曼城出征世冠盃前最後1场联赛，周日(17日)凌晨主场惨被水晶宫逼和2比2，近6场联赛只得1胜。曼城依家落後榜首利物浦3分兼踢多1场，嚟紧又要飞去沙特阿拉伯踢世冠盃，当佢哋返英超後，最坏情况系落後利物浦12分。

曼城今场继续有艾宁夏兰特缺阵，不过主场仍然控制战局，基亚利殊24分钟先开纪录，历高利维斯54分钟门前混战再入1球。领先2球嘅曼城以为坐定粒六，点知尾段离奇冧档，水晶宫前锋桑马迪达76分钟接应传中近门射入，补时4分钟菲尔科顿禁区踢跌对手，米高奥利斯为水晶宫操刀射成2比2完场。

曼城再度失分後，近6场联赛只有1胜4和1负成绩，亦系自2016年12月哥迪奥拿执教曼城嘅第1季後，首次连续3场联赛主场赢唔到波。由於曼城将会暂别英超出战世冠盃，下一场联赛要到月底对锡菲联，期间利物浦会有3场联赛，曼城返到嚟随时会落後「红军」12分。

哥迪奥拿赛後表示：「呢个结果唔关运气事，而系我哋应得，当你输呢啲12码，赢唔到波系应该。我哋其实踢得好好，就好似对利物浦同热刺，但我哋就系唔够稳定去保住胜果。我哋嚟紧要坐7个钟头飞机去踢世冠盃，带住3分上机当然最好，但现实如此，要尽快收拾心情应付之後比赛。」