西维尔换帅立竿见影，新教练科里斯第1场领军之下，喺周三(20日)凌晨西甲作客以3比0大胜CF格兰纳达，老将沙治奥拉莫斯顶入1球。根据OPTA统计，呢位37岁中坚职业生涯累积18季西甲取得入球，同已退役嘅贝迪斯名将祖亚昆，并列踏入21世纪以来，最多季西甲入波嘅球员。

西维尔上轮西甲吞基达菲3蛋之後，教练迪亚高阿朗素被炒，并聘请前屈福特领队科里斯接手执教，果然立即发挥「新帅效应」，上半23分钟艾迪亚柏祖沙左路传中，省中对手改变方向，反而直接笠入打开纪录。仅过9分钟，奥甘波斯离门大约30码远射入世界波，领先2球。

换边後冇耐，沙治奥拉莫斯接应罚球顶入成3比0，亦系呢位老将今季回巢之後，首次喺联赛入波，累积18个不同西甲球季都有波入，同祖亚昆睇齐，成为踏入21世纪以来，最多季西甲入波嘅球员，如果佢下季再入波，就可以刷新纪录。

赛後沙治奥拉莫斯喺社交网话：「1场必须、艰苦、当之无愧嘅胜利，好开心可以为球队入波，现已重上正轨，前进吧，西维尔。」西维尔结束连续10场联赛不胜困局，总算可以舒缓护级压力。