波兰前锋罗拔利云度夫斯基今季表现下滑，虽然仍然有8球成为队中首席射手，但入球产量同战术作用都受到质疑，据报「罗拔仔」合约内有加薪条款，明年人工将增加520万镑(约5,200万港元)。巴塞正研究阻止条款生效，好大机会提前将呢位老将卖走。

「罗拔仔」2022年夏天由拜仁慕尼黑加盟，由於巴塞受到财政问题所限，呢位波兰前锋签署嘅3+1年合约，人工采用每年递增方式，上季年薪系1,730万镑(约1.73亿港元)，今季加至2,250万镑(约2.25亿港元)，下季开始嘅第3年合约，人工将会再增加520万镑。

据西班牙《每日体育报》消息，巴塞教练沙维对「罗拔仔」嘅防守效率表示不满，上场联赛赢艾美利亚，沙维半场期间就同「罗拔仔」发生争执。报道指巴塞唔想养住高薪兼唔啱用嘅球员，打算喺加人工条款启动前将35岁嘅「罗拔仔」卖走。